Psalms 66
Koulen Kapingkalahngan ▼▼ TITLE NI MAHSEN EN IPRU: Koul pwoat.
1Aramas koaros en ngisingiski ar peren oh kapikapinga Koht! 2Kumwail koulki lingan en mware;
kumwail kapingahki ih koulen kaping!
3Kumwail patohwanohng Koht, “Maing, ia uwen kapwuriamwei en wiepen nin limomwi kan!
Sapwellimomwi manaman me lapalap mehlel
kahrehda imwintihti kan kin poaridi mwohmwi ni lemmwin.
4Aramas koaros nin sampah kin kaudokiong komwi;
re kin koulkihong komwi koulen kaping,
re kin koul kapikapinga mwaromwi.
5Kumwail patohdo oh kadehde dahme Koht ketin wiadahr,
wiepen nin lime kapwuriamwei kan nanpwungen aramas akan.
6E ketin wekidehngehr sehdo ni sahpw madekeng;
atail pahpa kahlap ako kotehla pihlo sapasapal pohn pwehl.
Se inenen perenkihda wiepen nin lime wasao. b
7E kin ketin kaunkihda wasa sapwellime manaman kohkohlahte,
oh e kin ketin mwasamwasahn wehi kan.
Eri me kahngohdi kan re en dehr pelianda.
8Kumwail wehi kan koaros, kumwail kapinga atail Koht;
ngilen amwail kaping en lelpeseng wasa koaros.
9Ih me ketin komokomour kitail
oh sohte ketin mweidohng kitail en pwupwudi.
10Maing Koht, komw ketin songosong kiht;
duwehte silper eh kin mwakelekelkihla kisiniei,
iei duwen omwi kin ketin song kiht.
11Komw ketin mweidohngkitehr se en lohdiong nan lidip
oh ketikihong wisik toutou pohn pwopwat akan.
12Komw ketin mweidohngehr at imwintihti kan en tiangkitedi;
se weweidier nan kisiniei oh nan lapake,
ahpw met komw ketin kahluwaikitodohng wasa mwahu ehu.
13I pahn patohwanlahng nan tehnpasomwi ei meirong isihs;
oh patohwanohng komwi dahme I inoukidahr.
14I pahn patohwanohng komwi dahme I inoukihong komwi
ni ahnsou me I patopato nan apwal laudo.
15I pahn patohwando ekei sihpw en isihsla pohn pei sarawio;
I pahn meirongkihong komwi kouwol oh kuht,
oh edin meirong wet pahn edidawohng pahnlahng.
16Kumwail patohdo oh rong, kumwail koaros me kin wauneki Koht,
I ahpw pahn koasoiaiong kumwail dahme e ketin wiahiongieier.
17I patohwan likweriong oh peki en ketin sewese ie;
I patohwan koul kapinga ih.
18Ma I pohnsehsehla dipei kan,
Kaun-o sohte pahn ketin karonge ie.
19Ahpw Koht ketin kupwureiehla;
e ketin karonge ei kapakap.
20I patohwan kapinga Koht,
pwehki e sohte ketin soikala ei kapakap
de katokehdi sapwellime limpoak poatopoat ong ie.
Copyright information for
PON2006A